Sagan öll með Illuga Jökuls – Ævintýri á S-Ítalíu

Tíu þúsund fet kynna meiriháttar hringferð til Suður-Ítalíu, þar sem hver sögu- og náttúruperlan rekur hver aðra. Dvalið er á huggulegum hótelum, þar sem vel fer um farþega. 

Þaulreyndir íslenskumælandi fararstjórar halda utan um hópinn. Vönduð dagskrá í boði og mikið innifalið. Í þessa ævintýralegu ferð okkar um S-Ítalíu kemur Illugi Jökulsson með okkur þar sem rithöfundurinn skemmtilegi fræðir okkur á sinn einstaka hátt um sögu og siði lands og þjóðar. 

Hér er frábært tækifæri til að upplifa stórbrotna menningu og njóta óþrjótandi afþreyingarmöguleika í sögufrægustu borgum heims.

Hér er á ferðinni fróðleg og skemmtileg menningarferð, þar sem einstök náttúra, saga, mannlíf og dásamlegur matur og góðar veigar skipa stórt hlutverk.

• Sögufrægar borgir!
• Fornminjar á heimsminjaskrá UNESCO!
• Fagurt landslag!
• Heillandi eyjar!
• Meiriháttar matargerð!
• Ljúffeng vín!
• Vínrækt!
• Mekka pastagerðarinnar!
• Mekka Limoncello!
• Vönduð fræðsla!
• Menning og listir!
• Glæsilegar byggingar!
• Sögufrægt eldfjall!
• Páfagarður!

Ítalía

Ítalía liggur við Miðjarðarhafið á Appenína-skaganum í Suður-Evrópu og hefur lögun landsins verið líkt við háhæla stígvél. Landið er 301.340 ferkílómetrar að stærð og á landamæri að Frakklandi, Sviss, Austurríki og Slóveníu. Þá umlykur Ítalía tvö sjálfstæð ríki, San Marínó og Vatíkanið. 

Fjöldi íbúa er tæplega 59 milljónir og er landið það þriðja fjölmennasta innan aðildarríkja Evrópusambandsins. Flestir íbúanna búa í höfuðborginni Róm eða tæplega 3 milljónir. Á Ítalíu er opinbera tungumálið ítalska en mállýskurnar eru margar og ólíkar eins og á Sikiley, í Napolí og í Feneyjum. Margir leita til Ítalíu til að læra þetta skemmtilega tungumál.

Veðrið er fjölbreytt og skiptist eftir landshlutum, en Miðjarðarhafsloftslag er þó ríkjandi með heitum og þurrum sumrum og mildum vetrum. Í norðrinu, sérstaklega í Alpafjöllunum einkennist veðrið hins vegar af köldum vetrum og snjókomu og heitum sumrum.

Ítalíu á sér gríðarlega langa og ríka sögu, sem nær mörg þúsund ár aftur í tímann, þar sem ýmsar fornþjóðir lögðu grunn að ýmsum menningarlegum þáttum landsins en samspil þeirra við sögulega atburði hafa mótað þjóðarvitund þeirra í gegnum tíðina. 

Ítalir búa yfir ríkri menningarhefð og listum, þar sem þeir hafa lagt mikið að mörkum til bókmennta, tónlistar og vísinda svo fátt eitt sé nefnt en Dante, Verdi, Vivaldi og Galileo Galilei voru allir frá Ítalíu. Þá er landið þekkt fyrir einstakan arkitektúr,  myndlist og skúlptúra, eins og St. Péturskirkjuna í Vatíkaninu, Colosseum í Róm og listamennirnir Leonardo da Vinci, Michelangelo og Raphael Sanzio, Ítalía er með flest svæði í heimi á heimsminjaskrá UNESCO, þar á meðal borgir eins og Feneyjar, Flórens og fornborgina Pompei. Þá er Ítalía heimsþekkt fyrir matargerðina sína, þar sem þeir bjóða upp á heimsins bestu pastarétti, pizzur og auðvitað langbesta ísinn. Þá er að finna héruð á Ítalíu sem rækta heimsklassa ólífur og vinna þeir ýmsar olíur úr þeim. Ítalir eru einnig þekktir fyrir vínræktina, sem þeir hafa stundað í hundruð ára og toppurinn verður að teljast eftirréttarvínið þeirra, limoncello.

Landslagið á Ítalíu er afar fjölbreytt, allt frá snævi þöktum tindum Alpafjalla í norðri yfir í sólríkar strendur við Miðjarðarhafið, þar sem Amalfi-ströndin verður að teljast sú vinsælasta. Þá má finna þar gróðursælar hæðir og fjöll og grösug flatlendi, þar sem ýmis ræktun á sér stað.

NOKKRAR STAÐREYNDIR UM ÍTALÍU

• Etna er stærsta og virkasta eldfjall heims, en þar gýs um 200 sinnum á ári!
• Elsti starfandi háskóli Evrópu er staðsettur í borginni Bologna, stofnaður árið 1088.
• Ítalir fundu upp espresso-kaffivélina og á Ítalíu má finna yfir 160.000 kaffitería.
• Yfir 350 tegundir af pasta er að finna í ítalskri matargerð!
• Ítalir fundu upp fyrstu gleraugun!
• Í Feneyjum er að finna yfir 400 brýr!
• Páfagarður í Róm er minnsta og fámennasta sjálfstæða ríki heims!
• Ítalía býr yfir 58 stöðum sem hafa verið settir á heimsminjaskrá UNESCO!
• Lífaldur Ítala er með þeim hæsta sem gerist í heiminum!
• Ítalir nota yfir 250 handabendingar til þess að tjá enn frekar það sem þeir segja!
• ,,Gelato” ísinn var fundinn upp á endurreisnartímanum í Flórens!
• Fyrsti pizzastaðurinn var opnaður í Napolí árið 1830!
• Róm er borg gosbrunnanna, en þar er að finna yfir 2.000 gosbrunna!
• Á hverjum degi henda ferðamenn samtals 3.000 evrum í Trevi gosbrunninn!
• Píanó var fundið upp á Ítalíu!
• Colosseum í Róm er stærsta hringleikahús veraldar!

Það er í raun ekki hægt að fanga allt sem Ítalía hefur upp á að bjóða í stuttu máli, landið er einfaldlega frábært heim að sækja og um það þarf ekki að hafa fleiri orð!

Róm

Róm sem er höfuðborg Ítalíu er staðsett á Mið-Ítalíu á vesturströndinni á bökkum Tíber-fljótsins og umlykur borgin borgríkið Vatíkanið, þar sem höfuðstöðvar kaþólsku kirkjunnar er með aðsetur páfans. Borgin er stundum kölluð ,,borgin eilífa” en til forna var hún höfuðborg heimsveldisins.

Í Róm er að finna marga áhugaverða staði ásamt skemmtilegum afþreyingarmöguleikum og dásamlegum mat.

Róm er einna þekktust fyrir hinar frægu byggingar, Colosseum, sem er stærsta hringleikahús veraldar þar sem m.a. glæsilegar bardagasýningar fóru fram og svo hin ægifagra Péturskirkja sem er stærsta kirkja Evrópu. Pantheon í Róm er síðan meðal best varðveittu bygginga heims, en arkitektúrinn þykir einstakur, sérstaklega fyrir sakir hvolfþaksins sem er það stærsta sinnar tegundar úr óstyrkri steypu. 

Þá eru málverk Michaelangelo, Botticello og félaga á veggjum Sixtínsku kapellunnar í Vatíkaninu engu lík en þau teljast til frægustu listaverka sögunnar. Í Róm er síðan að finna hið forna Rómatorg eða Roman Forum, þaðan sem borgin byrjaði að vaxa en þar var miðpunktur viðskipta, menningar og stjórnsýslu Rómaveldis. Navónutorg telst síðan vera eitt fegursta torg Rómar, en áður fyrr var þar leikvangur Circus Agonalis. Þá má ekki nefna Róm án þess að minnast á Spænsku tröppurnar og Trevi-brunninn, þar sem þúsundir evra enda daglega ofan í brunninum.

Hægt er að finna söfn af ýmsu tagi í borginni, m.a. þjóðminjasafnið, sem inniheldur mikið af fornleifum og listaverkum frá Rómaveldi. Galleria Borghese listasafnið er líka skemmtilegt heim að sækja, með málverkum eftir snillinga eins og Michelangelo og Raphael. Þá er þar einnig að finna listasafn tileinkað samtímalist.

Matar- og vínmenning þeirra heimamanna einkennist af heimagerðu pasta, þar sem þekktustu pastaréttir Rómar eru Cacio e Pepe og Carbonara. Þá eru Rómarbúar snillingar í pizzugerð og er pizza al Taglio ein af þeim vinsælustu en hún minnir á heimagerðar kassalaga pizzur með þykkum botni, bragðgóðri sósu, áleggi og ljúffengum þykkum mozzarella osti. Ítalir elska líka ís en ítalska ísinn er mjög víða hægt að finna í borginni. Róm er síðan umkringd frægum vínræktarsvæðum eins og Frascati og Castelli Romani og er auðvelt að fara í vínsmökkun á velvöldum vínbúgörðum. 

Róm er einfaldlega borg borganna!

Napólí

Napólí, sem er þriðja stærsta borg Ítalíu, er í Campania-héraði á Suður-Ítalíu með tæplega eina milljón íbúa. Borgin á sér langa sögu eða aftur um 2.500 ár en í samhengi við margt á Ítalíu, þá er hún ekki gömul og því var hún kölluð Nýja borgin. Borgin er full af sögu, menningu og ómótstæðilegum mat.

Hin 2.500 ára gamla saga Napólí býr yfir mörgum sögufrægum byggingum og minnisvörðum og stundum hefur borgin einfaldlega verið skilgreind sem ítalska borgin sem er með of mikla sögu til að ná yfir hana alla. Það ber því ekki að undra að miðborgin hafi verið sett á heimsminjaskrá UNESCO. Byggingastíllinn einkennist af miðaldar-, endurreisnar- og barokkstíl. Í borginni er að finna 448 sögufrægar kirkjur en á heildina eru kirkjurnar 1.000, sem gerir borgina að kaþólskustu borg heims, þegar tekið er tillit til fjölda starfsmanna sem tengjast kirkjunum. Ein þessara kirkja er Duomo di Napoli eða dómkirkjan, sem er þekkt fyrir hversu fagurlega hún er skreytt og eins fyrir arkitektúrinn. 

Iðandi mannlífið, sem einkennist m.a. af lifandi tónlist, myndlistar- og götulistamönnum, á strætum þessarar sögufrægu borgar skapar skemmtilega stemningu en þar er að finna fjölda góðra kaffitería, veitingastaða og fallegra verslana og því auðvelt að gleyma sér og njóta þess sem borgin býður upp á. San Gregorio Armeno er ein af skemmtilegri götum borgarinnar, þar sem gatan er fræg fyrir handverksfólk, sem selur fallega muni sína til ferðamanna. Fyrir þá sem hafa áhuga á listum og menningu, þá er að finna í borginni listasafnið Museo di Capodimonte, sem er ríkulega skreytt verkum meistara á við Caravaggio og Titian. Í Napólí er síðan að finna eitt elsta og frægasta óperuhús í heimi, þar sem reglulega eru sýndar bæði óperur og ballett. 

Rétt utan við Napólí er síðan að finna hið virka eldfjall Vesúvíus en fyrir þá kjörkuðu er hægt að fara í göngu upp á topp og njóta fagurs útsýnis yfir Napólí og Napólí-flóa. Neðan við fjallið standa rústir Pompeii-borgar, sem grófst undir ösku í eldgosinu árið 79 e.Kr. Borgin sú þykir ein merkilegasta í sögu fornleifarannsókna.

Matarmenningin í Napólí er einföld, íbúarnir elska pizzur enda var pizzan fundin upp í Napólí. Pizzan þeirra er þekkt fyrir þunna og mjúkan botn og fersk, einföld hráefni. Napólí er líka þekkt fyrir sitt sterka espresso kaffi, sem allir verða að bragða á.

Pizza, kaffi og fullt af sögu er hreinlega samsetning, sem getur ekki klikkað í Napólí!

Ómetanlegar söguslóðir Pompeii

Hin forna borg Pompeii er í nágrenni við borgina Napólí á suður Ítalíu. Talið er að um tuttugu þúsund manns hafi búið í Pompei þegar mest var og flestir stunduðu þeir viðskipti af ýmsu tagi. 

Pompeii var rómverskur verslunarstaður og íbúarnir voru frægir fyrir að byggja sér glæsileg hús og vera snillingar í að útbúa gómsæta fiskrétti. Pompeii eyðilagðist ásamt fleiri bæjum og borgum í kröftugu eldgosi úr eldfjallinu Vesúvíusi 24. ágúst árið 79 eftir Krist. 

Sorrento – Draumastaður við Amalfi-ströndina

Sorrento, sem liggur við strandirnar á suðvesturhluta Ítalíu, er dásamlegur áfangastaður á hinni fögru Amalfi-strandlengju. Þessi heillandi bær er staðsettur í hlíðum þar sem finna má heillandi landslag og fegurð Miðjarðarhafsins, Sorrento er í raun fullkominn staður fyrir þá sem vilja blanda saman náttúrufegurð, iðandi menningu og afslöppun.

Sorrento er með einstakt útsýni yfir Napólí-flóa og Vesúvíus-eldfjallið. Í bænum eru einnig sögulegar byggingar frá tímum Rómverja og fallegar gamlar kirkjur. Í Sorrento má finna notalegar verslunargötur, góðar gönguleiðir og úrval góðra veitingastaða og kaffihúsa. 

Capri – Þar sem rómantíkin svífur yfir vötnum

Capri, hin heillandi eyja á Napólí-flóa, hefur lengi verið talin einn af glæsilegustu áfangastöðum Ítalíu. Þessi litla eyja er þekkt fyrir náttúrufegurð, fallegt útsýni, glæsilegar villur og dásamlegar hvítar strendur. Capri hefur verið vinsæl meðal ferðamanna og frægðarfólks frá tíma rómverska keisarans Tiberíusar.

Eyjan er þekkt fyrir einstakt umhverfi, sem einkennist af bröttum klettum með iðagrænum trjágróðri og litríkum blómum.

Bærinn Capri er sjarmerandi með þröngum steingötum, handverksverslunum og úrvali veitingastaða þar sem hægt er að smakka ýmis konar ítalskan mat og drykki. 

Capri er einnig full af sögu og menningu, þar sem þú getur skoðað rómverskar villur, eins og villu Tiberíusar, og ímyndað þér hvernig rómverskir keisarar á sínum tíma upplifðu þessa paradís. Lúxusyfirbragð eyjarinnar og óviðjafnanlegt landslagið gerir Capri að ævintýri fyrir alla sem heimsækja hana. 

Dagur 1 – Ferðadagur – Flug með Icelandair til Rómar

Dagur 2 – Gönguferð um miðborg Rómar – Colosseum – Roman Forum og Palatine hæð

Dagur 3 – Vatíkanið, Péturskirkjan og Sixtínska kapellan

Dagur 4 – Vínsmökkun á vínbúgarði rétt utan við Róm

Dagur 5 – Frjáls dagur í Róm

Dagur 6 – Napólí – Göngutúr um miðborgina

Dagur 7 – Pastabærinn – Gragnano

Dagur 8 – Frjáls dagur í Napólí

Dagur 9 – Pompeii – Sorrento

Dagur 10 – Sorrento – Bæjarferð – Limoncello

Dagur 11 – Sigling – Capri 

Þriðjudagur 13. október – Positano – Sigling Amalfí

Dagur 12 – Frjáls dagur í Sorrento

Dagur 13 – Ferðadagur – Flogið með Icelandair til Keflavíkur

Sjá ítarlega dagskrá hér fyrir neðan.

Ef þú ert að spá í fararstjórninni, þá eru hér nokkur meðmæli frá farþegum síðustu ferðar til Ítalíu, sem hjálpa þér vonandi við að taka ákvörðun um að koma með í þessa ævintýraferð:

,,Takk fyrir frábæra ferð! Mæli svo sannarlega með 10.000 ferðum – allt skipulag, þjónusta og upplifun til fyrirmyndar. Sérstakar þakkir fyrir að halda svona vel um hópinn – algjörlega ógleymanleg ferð.”

Kolbrún Vídalín, Sagan öll með Illuga á S-Ítalíu 2025

„Hjartans þakkir fyrir frábæra ferð. Við fengum að sjá svo marga stórkostlega staði og fræðast um fólk og atburði löngu liðanna tíma. Ógleymanlegt ferðalag. Takk Rún, Trausti og Illugi.Við Styrmir mælum svo sannarlega með Tíu þúsund fetum.”

Helga María Jónsdóttir, Sagan öll með Illuga á S-Ítalíu 2025

,,Kærar þakkir fyrir frábæra ferđ. Ég vona svo sannarlega ađ ég komist í fleiri ferđir međ ykkur. Gangi ykkur vel í framtìđinni. Þiđ rokkiđ. Takk öll fyrir frábæra samfylgd undanfarna daga. Þakkir til ykkar, Rún ogTrausti fyrir gott skipulag, alúđ og hlýju út alla ferđina. Takk Illugi fyrir fróđleik, bæđi huggulegan og óhuggulegan á međan á ferđinni stóđ. Ég vona svo sannarlega ađ ég komist í fleiri ferđir međ ykkur. “

Ásta Björk Sveinbjörnsdóttir, Sagan öll með Illuga á S-Ítalíu 2025

,,Mikið vorum við hjónin heppin að velja þessa dásamlegu ferð með 10000 fetum, með Trausta og Illuga. Erum full þakklætis og óskum ykkur og öllum ferðafélögum gleði og gæfu.“

Erla Jóhannsdóttir, Sagan öll með Illuga á S-Ítalíu 2025

,,Bestu þakkir fyrir okkur. Þetta er búin að vera frábær ferð og ógleymanleg í alla staði. Rún, Trausti og Illugi, þið eruð öll frábær.“

Guðmundur Haukur, Sagan öll með Illuga á S-Ítalíu 2025

,,Bestu þakkir fyrir frábæra ferð. Þið eruð frábær.“

Jóhanna Kristín Jósefsdóttir, Sagan öll með Illuga á S-Ítalíu 2025

Í ferðinni verður gist á eftirfarandi hótelum eða sambærilegum.

Í Róm verður gist á 4* hótelinu Twenty One með morgunverði.

Hótelið er vinalegt og staðsett í rólegu hverfi borgarinnar en frá hótelinu er auðvelt að taka neðanjarðarlest í miðborgina.

Á hótelinu eru hugguleg herbergi, sem eru búin helstu þægindum, með þráðlausu gjaldfrjálsu neti, loftkælingu, öryggishólfi, minibar, sjónvarpi, baðvörum og hárblásara. 

Maturinn á gististaðnum er fjölbreyttur og þar geta allir fundið eitthvað gómsætt til að kitla bragðlaukana, sem hinir ítölsku kokkar sjá um að matreiða fyrir mannskapinn. Ríkulegt morgunverðarhlaðborð en einnig er hægt að borða á veitingastað hótelsins að loknum viðburðaríkum dögum í Róm. Á verönd hótelsins er barsvæði, sem býður upp á ljúffenga kokteila og léttmeti.

Í Napóli verður gist á 4* hótelinu Hotel Ramada Naples með morgunverði. 

Hótelið er staðsett í hinni sögufrægu miðborg Napólí, aðeins 200 metrum frá lestarstöðinni og Garibaldi-torgi.

Á hótelinu eru snyrtileg herbergi, sem eru búin helstu þægindum, með þráðlausu gjaldfrjálsu neti, loftkælingu, öryggishólfi, minibar og sjónvarpi. Morgunverðarhlaðborðið hefur að geyma ferskt brauðmeti, osta, skinkur, ferska ávexti og úrval af sætabrauði. 

Í Sorrento verður gist á 4* hótelinu Gran Hotel Vesuvio með morgunverði. 

Hótelið stendur á fallegri útsýnishæð í Sorrento, en hótelið er staðsett í um 5 mínútna fjarlægð frá ströndinni, Meta di Sorrento og í um 5 km fjarlægð frá gamla miðbænum. 

Á hótelinu eru snyrtileg herbergi, sem eru búin helstu þægindum, með þráðlausu gjaldfrjálsu neti, loftkælingu, öryggishólfi, minibar, sjónvarpi og hárblásara. 

Á hótelinu er að finna þrjá huggulega innréttaða matsali, þar sem hægt er að borða bæði hádegis- og kvöldverð sem einkennist af ferskum fiskréttum og matreiðslu heimamanna. Þá er barsvæðið bjart og fallegt, með fallegu útsýni til sjávar.

Vinsamlega athugið að ljósmyndir af gististöðum, sem birtar eru á heimasíðu Tíu þúsund feta, eru fengnar frá gististöðunum. Þær eru aðeins til þess að gefa hugmynd um útlit þeirra. Tíu þúsund fet bera ekki ábyrgð á því ef eitthvað hefur breyst á gististöðunum frá því að ljósmyndir voru teknar. Tíu þúsund fet stjórna ekki staðsetningu farþega innan gististaða.

Í hringferð Tíu þúsund feta fara þaulreyndir íslenskumælandi fararstjórar með í ferðirnar. Rún og Trausti hafa starfað við margs konar ferðaþjónustu í 25 ár ásamt því að ferðast um víða veröld, þar sem þau störfuðu meðal annars sem fararstjórar til margra ára á Ítalíu.

Rún og Trausti munu sjá til þess að farþegar upplifi og njóti sín til fulls í þessari draumaferð um Suður-Ítalíu, þar sem fræðsla og umfram allt skemmtileg upplifun verður í fyrirrúmi.

Illugi Jökuls fræðir farþega

Í þessa ævintýralegu ferð okkar um S-Ítalíu kemur Illugi Jökulsson með okkur þar sem rithöfundurinn skemmtilegi fræðir okkur á sinn einstaka hátt um sögu og siði lands og þjóðar. 

Illugi er sonur Jóhönnu Kristjónsdóttur og Jökuls Jakobssonar. Elísabet Jökulsdóttir rithöfundur og Hrafn Jökulsson eru alsystkini hans. Illugi er giftur leikkonunni Guðrúnu Gísladóttur. Dóttir þeirra er útvarpskonan Vera Illugadóttir.

Illugi gekk í Menntaskólann í Reykjavík, en hætti skólagöngu sinni 1979, þá í sjötta bekk. Hann hóf störf sem blaðamaður á Vísi í apríl 1979 og starfaði þar til vors 1981. Árið 1986 hóf Illugi umsjón sína á útvarpsþættinum „Frjálsar hendur“ á Rás 1 og hefur sinnt því starfi nánast sleitulaust síðan. Illugi stofnaði tímaritið Sagan öll árið 2007 og gegndi þar ritstjórnarstörfum. Einnig stofnaði hann og ritstýrði tímaritinu Skakki turninn, þar sem hann vann með Veru.

Flug

• Flug með Icelandair frá Keflavíkurflugvelli til Rómar. 
• Flug með Icelandair frá Róm til Keflavíkurflugvallar.
• Flugvallagjöld og skattar.

Sigling

• Sigling til og frá Capri.
• Sigling frá Positano til Amalfi

Farangur

• Ferðataska 23 kg
• Handfarangur 8 kg

Hótel

• Gisting í 13 nætur á 4* hótelum í Róm, Napólí og Sorrento m/morgunverði.

Fæði – Drykkir

• Morgunmatur
• Vínsmökkun í Róm – Castelli Romani
• Matarsmökkun og hádegisverður í ekta ítalskri pastagerð – Gragnana
• Limoncello vínsmökkun – Sorrento

Akstur

• Akstur til og frá flugvöllum á Ítalíu.
• Rútuferðir í öllum skoðunarferðum.

Skoðunarferðir

• Allar skoðunarferðir með íslenskri fararstjórn
• Aðgöngumiðar í auglýstum skoðunarferðum

Fararstjórn

• Sagan öll með Illuga Jökulssyni
• Vönduð íslensk fararstjórn tveggja þaulreyndra fararstjóra Tíu þúsund feta.
• Þjónusta staðarleiðsögumanna.

Í nafni náttúrunnar

• Gróðursetning á trjám á Íslandi fyrir hvern farþega sem fer í ferðina.

EKKI INNIFALIÐ

• Hádegisverður, nema þar sem það er tekið fram
• Kvöldverður
• Drykkir með hádegis- og kvöldverði, nema þar sem það er tekið fram
• Valfrjálsir dagskrárliðir og annað sem ekki er tilgreint sem innifalið
• Gistináttaskattur
• Ferðatryggingar
• Þjórfé

• Stuðningssokkar geta komið sér vel fyrir flugið, en þeir geta minnkað líkur á bjúg og blóðtappa í fótum. 
• Léttur bakpoki.
• Þægilegir strigaskór og sokkar.
• Fatnaður sem hentar heitu loftslagi.
• Sandalar.
• Vatnsflaska.
• Sólarvörn (einnig fyrir varir).
• Sólgleraugu. 
• Sundföt og strandskór. 
• Hleðslubanki fyrir síma getur verið sniðugur og gott að búa til pláss fyrir myndir á minniskubbi myndavélar. 
• Þá er gott að hafa göngustafi (þeir sem eru vanir því). 
• Plástur, hælsærisplástur, sótthreinsikrem og handspritt. 
• Steinefnatöflur, verkjatöflur og pappírsþurrkur. (Klósettrúlla getur komið sér vel í bakpoka)
• Skordýrafælandi efni til að verjast moskítóbitum. Þá er mælt með því að taka B12 vítamín nokkrum vikum fyrir brottför og fyrir þá sem eru með sterk ónæmisviðbrögð vegna skordýrabita gætu þurft að huga að því að taka viðeigandi ofnæmistöflur. 
• Varðandi vegabréf, þá þurfa íslenskir ríkisborgarar ekki VISA til að komast inn í landið en gæta þarf að gildistíma vegabréfs.
• Gjaldmiðillinn er evra og víða er hægt að nálgast miðilinn á Ítalíu. Gott að hafa greiðslukort, ekki bara í símanum. 
• Afrit og ljósmynd af vegabréfi.

• Þá þarf að huga að ferðatryggingum tímanlega. (ekki innifalið)
• Þeir sem ferðast með lyf, ættu að hafa þau í upprunalegum pakkningum og geyma í handfarangri. 
• Ekki þarf sérstök millistykki til að stinga raftækjum í samband.
• Við mælum með því að fólk skilji alla skartgripi eftir heima og taki sem minnst af verðmætum með sér.

Athugið að listinn er ekki tæmandi og aðeins til viðmiðunar.

Dagur 1

Ferðadagur

Flogið er frá Keflavíkurflugvelli með flugfélaginu Icelandair kl. 7:50 og lent í Róm kl. 14:25. Rútur bíða farþega fyrir utan flugstöðvarbygginguna en þaðan er keyrt heim á hótel, þar sem farþegar geta skráð sig inn og komið sér fyrir inn á herbergjum.

Dagur 2

Gönguferð um miðborg Rómar – Colosseum – Roman Forum – Palatine-hæð. 

Eftir morgunverð kl. 9:00 fer hópurinn saman í gönguferð á sögufrægar slóðir Rómar. Fyrst verður gengið að Pantheon, þar sem við kíkjum inn í musterið og virðum fyrir okkur ótrúlegan arkitektúr þess. Því næst verður komið við hjá Trevi gosbrunninum, þar sem sú hefð, að kasta evru út í brunninn, hefur skapast í gegnum tíðina fyrir góðri lukku. Eftir það verður gengið að Spænsku tröppunum, lengstu og breiðustu tröppum Evrópu en þær eru jafnframt eitt helsta kennileiti borgarinnar þar sem  margir viðburðir hafa verið haldnir í gegnum tíðina. 

Þá göngum við frá spænska torginu og upp tröppurnar að Trinita dei Monti kirkjunni, þar sem fallegt útsýni gefst yfir svæðið. 

Eftir röltið verður farið á eitt af vinsælli torgum Rómar, Navona-torgið, þar sem sem hinn frægi gosbrunnur hinna fjögurra áa stendur fyrir miðju torgi, en torgið er líka þekkt fyrir fjöldann allan af skemmtilegum kaffiteríum og veitingahúsum með iðandi mannlífi og þar ætlar hópurinn einmitt að njóta góðs hádegisverðar (valfrjáls hádegisverður) 

Eftir hádegisverðinn verður hópurinn sóttur og keyrður að Colosseum, sem er stærsta hringleikahús veraldar og eitt af helstu táknum borgarinnar en það hefur verið sett á heimsminjaskrá UNESCO. Gengið verður um þessa fornsögulegu byggingu, sem er sú stærsta sinnar tegundar í veröldinni og fræðsla veitt um svæðið. 

Eftir heimsóknina í hringleikahúsið verður farið á Palatine-hæðina og inn á Rómartorg eða Roman Forum, þar sem hópurinn fær einstaka innsýn inn í líf Rómverja, þar sem finna má fornar rústir og byggingar, eins og Títusarbogann, þinghúsið, Juliu basilikuna og Vesta-hofið svo fátt eitt sé nefnt.

Að fræðslutúr loknum verður hópurinn sóttur á rútu og keyrður heim á hótel og þá tekur við frjáls tími.

Dagur 3

Vatíkanið – Sixtínska kapellan – Péturskirkjan

Eftir morgunverð kl. 9:00 verður farið í Páfagarð, þar sem höfuðstöðvar kaþólsku kirkjunnar er með aðsetur páfans. Þar mun hópurinn skoða hina ægifögru Péturskirkju, sem er sú stærsta í Evrópu og Sixtínsku kapelluna, sem er einstakt listasafn í Vatíkaninu, sem reist var árið 1479 en lofthvelfing hennar er prýdd meistaraverki eftir Michelangelo.

Í hádeginu er gefinn frjáls tími þar sem tilvalið er að fá sér góðan hádegisverð (valfrjálst) á velvöldu veitingahúsi og njóta miðborgarinnar í frjálsum tíma.

Dagur 4

Vínbúgarður

Eftir morgunverð er frjáls tími til klukkan 14:00, þá hittist hópurinn fyrir framan hótelið og fer saman í vínsmökkunarferð á vínbúgarði rétt utan við Róm. Þar tekur við vínsmökkun og fræðsla um vínrækt þeirra heimamanna. 

Dagur 5

Frjáls dagur í Róm

Dagur 6

Akstur frá Róm til Napólí – gönguferð um miðborgina í Napólí

Eftir morgunverð kl. 10:00 verður hópurinn sóttur á hótelið og þaðan verður lagt af stað til næsta áfangastaðar, sem er hin sögufræga borg Napólí. Aksturinn á hótelið í miðborg Napólí tekur um tvær og hálfa klukkustund en þegar þangað er komið, kemur hópurinn sér fyrir á hóteli og fer síðan saman í göngutúr um miðborgina, þessa 2.500 ára gömlu borg, sem í dag er þriðja stærsta borg Ítalíu. Þar virðum við fyrir okkur fornar byggingar og torg, förum m.a. á torgið Plebiscito, skoðum Nýja kastalann, dómkirkjuna, kíkjum á aðal verslunargötuna Via Toledo og þræðum þröng stræti gömlu miðborgarinnar. Þá göngum niður að hafnarsvæðinu og að ströndinni og virðum fyrir okkur hið tignarlega útsýni yfir til eldfjallsins, Vesúvíus.

Ef tími gefst til hafa farþegar möguleika á að heimsækja hin stórmerkilegu neðanjarðargöng Napólí-borgar (ath. aðgangur kostar aukalega).

Í framhaldi af göngutúrnum er tilvalið að fá sér eina ekta Napólípizzu!

Dagur 7

Pastaþorpið Gragnana

Eftir morgunverð förum við í létta hálfsdagsferð í pasta-þorpið fræga, Gragnana, þar sem talið er að pastað hafi orðið til á öldum áður. Þar verður okkur boðið í smökkun og hádegisverð í ekta ítalskri pasta-verksmiðju í bænum. Þá höldum við heim á leið og bjóðum uppá frjálst síðdegi og kvöld í Napólí.

Dagur 8

Frjáls dagur í Napólí

Dagur 9

Pompeii – Sorrento

Eftir morgunverð, gengur hópurinn frá farangri og skráir sig út af hótelinu og hittist í gestamóttöku, þar sem rúta bíður hópsins kl. 9:30. Frá hótelinu verður keyrt til hinnar fornu borgar, Pompeii, sem stendur undir hinu virka eldfjalli, Vesúvíus, en aksturinn þangað tekur rúma klukkustund. Góður tími verður gefinn til að skoða þessar stórmerkilegu fornu rústir, sem fundust í einum merkilegasta uppgreftri sögunnar í fornleifarannsóknum árið 1748 en borgin er talin vera frá árinu 79 e.Kr. Fræðsla verður veitt á staðnum. Í lok dags verður keyrt til Sorrento, þar skrá farþegar sig inn og njóta síðan frjáls tíma það sem eftir lifir dags.

Dagur 10

Sorrento – Bæjarferð – Limoncello

Frjáls dagur í Sorrento til að njóta sólar og slökunar. Hópurinn hittist síðan síðdegis í gestamóttökunni og tekur bæjarferð saman um hin gömlu, þröngu stræti Sorrento borgar, þar sem hann sogar í sig hina einu sönnu ítölsku menningu innan um iðandi mannlíf, skemmtilegar verslanir og veitingastaði. Þá verður farið í limoncello-smökkun. Í þessari ferð má alveg fá sér annan ítalskan ís! 

Dagur 11

Sigling – Capri 

Hópurinn verður sóttur eftir morgunverð kl. 9:00 og keyrður niður að hafnarsvæði Sorrento, þaðan sem siglt verður yfir til hinnar frægu eyjar Capri, sem er þekkt fyrir ríka sögu, frægt fólk sem þar hefur dvalið til lengri eða skemmri tíma, fallegar kirkjur, söfn og minnisvarða ásamt fallegum náttúruundrum eins og hellirinn, Blue Grotto og Faraglioni, sem eru þrír tignarlegir klettadrangar rétt utan við Capri. Siglingin tekur einungis um 20 mínútur og verður gefinn góður frjáls tími til að njóta á Capri áður en báturinn kemur aftur að sækja hópinn síðla dags. 

Dagur 12

Positano – Sigling Amalfi – Sorrento

Eftir morgunverð hittist hópurinn í gestamóttökunni kl. 10:00. Þaðan verður keyrt til Positano, þar sem hópurinn fær frjálsan tíma og í framhaldinu tekur við dásamleg sigling, þar sem siglt verður undir hinum stórfenglegu klettaþorpum Amalfí-skagans. Í Amalfi-borg gefst einnig frjáls tími og þaðan er ekið til fjallaþorpsins Ravello. Þar verður tekinn stuttur göngutúr um bæinn og síðan gefinn frjáls tími. Ferðina endum við svo í Sorrento.

Dagur 13

Frjáls dagur í Sorrento til að njóta mannlífs, slökunar og sólar.

Dagur 14

Ferðadagur – Flogið með Icelandair til Keflavíkur

Lagt af stað snemma morguns og ekið á flugvöllinn í Róm, þar sem áætluð brottför með Icelandair er kl. 15:45 og áætluð lending í Keflavík kl. 18:40. 

Vinsamlega athugið

Ofangreind dagskrá er birt með fyrirvara. Tíu þúsund fet áskilja sér rétt til að breyta dagskrá ef á þarf að halda með tilliti til veðurs og annarra aðstæðna, að sjálfsögðu með heill farþega í fyrirrúmi.